هلال ياسيني
syasini@hotmail.com
د ملي شاعر رحمت شاه سائل شعر دی:
سائله جوړ زمونږ خوبونه خپل خوبونه نه و
چې تل يې اپوټه اپوټه خېژي تعبيرونه
ای وي ټي خيبر چې جوړ شو نو ټول افغانان خوښ و چې له خيره د مظلومو افغانانو ممبر هم پيدا شو او اوس به كه خير وي نړۍ ته د پښتون اواز ورسېږي. او كه نور هيڅ نه وي نو زمونږ پښتون ولس ته خو به په خپله ژبه څوك سم معلومات وړاندي كړي. دا خوبونه ډېر د نوموړي چينل د مشرانو په وعدو بنا و. ښاغلي فردوس جمال چې د دې چينل افتتاح كوله نو د په داسې حال كې چې د سترګو نه يې اوښكې روانې وې د خوشحال خټك په قلم، د احمد شاه ابدالي او ايمل ايپي په توره، او د ميرويس نيكه په پوهه او حكمت يې خپلې افتتاحيه خبرې ښايسته كړې وې. مونږ هم د خوښۍ نه اوښكې تويولې چې افغان قوم هم د نړۍ په ژبه خبرې پيل كړې. خو زمونږ خوبونه هميشه اپوټه يا سرچپه خېژي. په خيبر ټي وي چې مونږ څومره نازېدلو هومره مېړنی ثابت نشو. او هاغه لنډۍ ده:
پرېږده چې خړ سيلاب مې يوسي
په لامبوزن جانان به ډېره نازېدمه
تېره اونۍ يانې د اپريل په اولسمه نېټه ای وي ټي خيبر د ارباب رووف په نامه يو سندرغاړی راغوښتی و. رووف ته د ځنو سندرو كمپوز او لارښونه د خالد خان په نامه يو كس كړې وه. د سندرو او پروګرام نه داسې مالومېده چې دا دواړه ښاغلي دومره هنرمندان يا فنكاران نه دي لكه څومره چې د خپلو ملي ارزښتونو څخه بې خبره او خرڅ شوي ګڼكپان دي. زمونږ د مشهور ملي شاعر ملنګ جان د لانديني شعر ډېر سپكاوی يې كړی و.
دا زمونږ زيبا وطن
دا زمونږ ليلا وطن
دا پر مونږ ډېر ګران دی
دا پښتونستان دی
دا شعر چې ملي ترانه هم ده د دغو بې پښتو ښاغلو لخوا په ډېره سپكه طريقه كمپوز او ليدونكو ته وړاندې كړی شوه. د شعر هر د پښتونستان او افغانستان توری د پاكستان په توري بدل او په ډېره بې هنره طريقه او بد اواز په دې شكل ويل شوی و:
دا زمونږ زيبا وطن
دا زمونږ ليلا وطن
دا پر مونږ ډېر ګران دی
ښكلی پاكستان دی
په افغان ولس د پنځوسو كالو راهيسي د ده له منځه وړلو دپاره حمله پيل شوې ده. د دې حملې غړي د ډيورنډ دواړو خواو ته شته دی. په لويه جرګه كې د افغان دښمنه ډلو ټول كوښښ دا و چې په څه شكل د دې هېواد ملي كلتور او هويت له منځه يوسي. پښتو ژبه چې ملي ژبه وه د دوی د ورانكاريو او انكار په نتيجه كې خپل مليتوب له لاسه وركړ. ملي ترانه يې شاخۍ تاخۍ كړه. اول يې بيخي په پښتو نه منله او بيا يې پكې د قومونو د نومونو د يادولو غوښتنه وكړه. د نړۍ په هيڅ هيواد كې هم داسې د خندا كار نه دی شوی چې اساسي قانون په يوه ماده كې قومي تبعيض منع كړی وي او په بله ماده كې په ملي ترانه كې د قومونو نومونه يادول لازمي ګڼلي وي. خو سره له دې هم تر اوسه لا ملي ترانه نه ده منلی شوې. كله په يوه بهانه او كله په بله بهانه د ملي تراني منظوري وروسته كېږي.
د ښاغلي مخدوم رهين په مشرۍ د افغانستان د كلتور وزارت هم د دې سپكاويو مسوليت په غاړه لري. كه د دې وزارت بې غوري نه وای او د دوی په وړاندې د سبا اونيزې د حضرت احمد شاه بابا رحمت الله عليه سپكاوی نه كولی نو نن به د خيبر چينل خالد خان هم دا جرائت نه كولو.
په هر حال د ای وي ټي خيبر نه د افغانانو هيله دا وه چې دوی به افغاني كلتور ته خدمت وكړي. افغانان به دې ته وهڅوي چې د قانون احترام وكړي. نړۍ به دې ته وهڅوي چې د افغان قوم د حقوقو احترام وكړي. خو په مقابل كې د دغه ټي وي مسولينو د ټولو پښتنو په زړونو يخي اوبه توی كړې او ورته يې وويل چې دا ټول خوبونه دي. د دې په ځای چې نوموړي ټي وي افغان ولس دې ته بللي و چې د شاعرانو او ليكوالانو د فكري ملكيت احترام وكړي، ملي هويت نور هم تقويه كړي، د دې په ځای يې ورته په تحفه كې د قانون د سرغړونې او د خپلو ليكوالانو او شاعرانو د فكري ملكيت د بې احترامۍ سبق وركړ. خو لكه سايل چې وايې:
دلته علم دلته فن څه دی سائله
د احساس او د وجدان د زړګي سوی دی
زمونږ د ملي ترانې ورانول او بيا په يو بد اواز او بې ارزښته كمپوز كې وړاندې كول د ډيورنډ د شرمونكې كرښې نه اخوا په كابل كې په ملي ارزښتونو د تجاوز روښانه انځور دی. كه د سبا اونيزه د افغان په كور كې د افغانانانو د اولياو او ملي اتلانو سپكاوی كوي نو طبيعي خبره ده چې په اسلام اباد كې دغه چينل هم د شهيد ملنګ جان او د هغه د ملت سپكاوی وكړي او د هغه د ورثه ادبي حق غلا كړي. زه په كابل كې د كلتور د ساتنې د دعوه كونكو څخه دا توقع نه لرم چې د خيبر ټي وي نه به د دې جرم پوښتنه وكړي، خو خيبر ټي وي ته په كار دي چې د ټول ولس نه په ښكاره په هماغه پروګرام كې بخښنه وغواړي په كوم كې يې چې سپكاوی كړی دی. او بله غوښتنه مې دا ده چې كه خدمت نه كوۍ او ابتكار نشۍ كولی نو د سپكاوي او ادبي غلاګانو نه هم لاس واخلۍ.
زه چې چا لوټ كړم پټ به وي خو پېژندلی مې دی
كه رانه سپينې جامې اغوندي كه تورې جامې
د ملي خيانت او بې شرمي فرهنګي غلا يوه بېلګه دلته واورئ
