دغزني لونګ !

١٣ دغويي ١٣٣٨٤ يونس برهان - کابل

لونګ پسول دى، لونګ خوشبويي ده، لونګ ښکلا ده، لونګ د سوچه پښتو کلتور نوم دى، لونګ د کليوال او پښتني دود نښه ده، لونګ د پښتنو د ادب او کلتور نه بېلېدونکى توکى دى.  لونګ د نجونو دغاړي هار دى، لونګ د  پېغلو د خوښي سندره ده، لونګ د ناوي د ټــټر پسول دى، او لونګ اوس ”د ښارونو د ناوي“ خپرونه ده. 

له نېکه مرغه دا دى اوس د لونګ وږمې له غزني نه چې يو وخت ورته 'د ښارونو ناوې' ويل کېده راپورته کېږي.  موږ هېله من يو چې لونګ د غزني تر جغرافيايي پولو ټاکلى پاتې نه سي او که خداى وکړي په وږمو به يې د هېواد د ننه او بهر پښتو ونازوو.

هو، لونګ د يوه هېر سوې او سپېره ولايت غـږ دى، هغه غږ چې که بيا هم د د همدې سيمې پرګنې پرې را ويښ نه سي بيا به مو لـه دې خوبه شپېلۍ د اسرافيل ويښوي.  

د لونګ ځانګړتيا داده چې سياست نه کوي او ليکنې يې يوازي د پوهنيز، څېړنيز او ادبي ډګر سره تړلې دي. د لونګ يوه موخه داده چې په داسې يوه سيمه کې چې هلته د ازادو رسنيو او خپرونو نوم هم نه تر سترګو کېږي خلک کلتوري کارونو ته وهڅوي.

په ناڅاپي توګه، د لونګ پيل نن د رسنيو د ازادۍ له نړيوالي ورځې سره سمون خوري چې موږ يې دا تصادف په نېک شګون نيسو.

لونګ دوه مياشتنۍ د محمد يونس برهان په سرلارۍ او هميم جلالزي او اسد الله بلهار په هڅو خپرېږي.  د دې لپاره چې د د مجلې د منځپانګې په لا شتمنوالي کې مو برخه اخيستي وي موږ ستاسو، ليکنو، وړانديزونو او رغنده نيوکو ته سترګي په لاره يو. هيله ده چې له داسې يوې خپرونې څخه چې نوي راټوکېدلي او د چلوونکو په ځاني لګښت چاپېږي خپل ملاتړ او مرستي ونه سپموئ چې يوازي د لوستونکو او مينه والو مينه او ملاتړ او زموږ ټينګ هوډ د لونګ د عمر د پايښت ژمنتيا کولاى سي.

په نژدې راتلونکي کي به لونګ په بېنوا کي هم ديوې ځانګړې برخي خاوند شي .

زموږ برېښناليک پته :  lawang.magazine@gmail.com

د ګرځنده شمېره : 079 041 021