په خزان کښي :
سر تر پایه سره لمبه شوم = روغ زړګی مي سوی سکور شو
نه ایرې نه مي دود ښکاري = بل راباندي څنــــــــــګه اورشو
نه لمبه مي شوه خاموشه = نه رڼا دا تیـــــــــــاره کور شه
په نارو مي ګل ویښ نشو = څه عبث مي د خولې شور شو
آه سپېـــره لو هدیـــره وه = له بلبــــــلو دا بڼ تــــور شـــو
ټــوله مړه دي ، ټوله مړه دي
که زاړه دي ، کــــه واړه دي
د لباخته شیدا بلبـــل وم = کــړه پر ګــل می آوازونــــه
سحري نغمو کښې ګل ته = را وړه ما پټ الهـــــــــامونه
ما وې زه به ګل خبر کړم = د خزان له شـــوا خونـــــــــه
ګل ویده غمــاز را پاڅېـد = زمانــې مات کړه وزرونـــه
آه ،وچاته درد اظهار کړم = په سینه مي ځي خــــــارونه
ټولـــه مړه دی ، ټوله مړه دي
کــه زاړه دي ، کـــه واړه دي
په خندا په نڅا راغلــــم = ما وېل اوس به نو هوس کړم
د سره ګل پر څانګو باندي = به خوشحاله خپل نفس کړم
د بوستان زیب و زینت به = په نغمو کشي یو په لس کړم
دا ویدي غنچې به ویښي = په آهنګ د خپل جرس کړم
له صیاده چاته زار کړم = چي بندي ئې د قــــفس کړم
ټوله مړه دي ، ټوله مړه دي
کــه زاړه دي ، کـــه واړه دي
پرون ګل سره همراز وم = نن ئې بوی لاموندای نه شم
چا له سېــله را جلا کړم = خپل همزولي لیدای نه شم
وزرونه ئې را مات کړه = په هوا الوتـــــای نه شم
ژبه تېــزه لرم خوله کښي = خو آزاد ږغېــــدای نه شم
غم شریک یاران مي ولاړل = زه تنها پاتېـــــــدای نه شم
ټولـــه مړه دی ، ټوله مړه دي
کــه زاړه دي ، کـــه واړه دي
بڼ خالی له زوږ او شوره = آواز نشـــته د بـــلبـــــلو
ځالۍ وراني پــاڼي ژړي = سرخي والـوته له ګــــلو
نه به بیــــا د ګل لمن وي = چي ئې نیسم په منګـــلو
نه غیبي قاصد به راشي = چي احوال را وړي د تللو
نه ملګری شو را پاتـــه = د خپــل زړه د راز ویــلو
ټولـــه مړه دی ، ټوله مړه دي
کــه زاړه دي ، کـــه واړه دي
ښه دی ښه چي ګل تالا شو = له خزانـــه به څه وایـــــم
جوړ بهار پر ما خزان دی = چي قفس کښي مبتلا یـــم
آه صیاد له سختـــــه دلــه = لابه څو په واویــــلا یـــم
له ازلــــــه بد نصیـب یم = داسي نه چي نن پیــدا یـــم
څوک مي نشته چي مي یاد کړي = بېنـــوا یـــم بېنــــــــوا یــم
ټولـــه مړه دی ، ټوله مړه دي
کــه زاړه دي ، کـــه واړه دي
