دلته د لار وروکو نه د لار پوښتنه مه کوه
لوټ بهير ته ګوره د سا لار پوښتنه مه کوه
هر يو پټه لار لري د خپل شيطان درشلي ته
خوله درله ګنډي دخدای د لار پوښتنه مه کوه
د ځوانيمرګ شهيد ،، احسان ،، په وير کي :
د نړۍ زبر ځواکونو په افغانستان کي د خپلو روا او ناروا ګټو خوندي ساتلولپاره د څو وحشي او له انسانيت ، اسلاميت ، او افغانيت څخه په واټنونو ليري او بيخبرو ساديستو ټولګيوو څخه په پټه اولڅه ملاتړ ، او په سياسي، اقتصادي ډګر کي ېې تمويل کړي او تمويلوي ٠
موږ افغانان د زبر ځواکونو دا له انصاف نه ليري عمل نه ژړوي ،موږ د مزدورانو او د اسلام نه بيخبرو ډلو څخه ژاړو ، موږ د هغه مظلوم يتيم او هغي بوري موراو هغي کونډي ناوي اوښکي ژړوي چي خپلوان او اړوندان يي ، وړمه ورځ د ( برژنيف ) په دستور ، پرون د ( نواز ، او پرويز ، شريف ؟؟ مشرف ؟؟ ) په دستور او نن د ( لادن او شيخ ) په امر او دستور د خدای (ج) د ورکړي حقه حق (ژوند) څخه بې برخي کړل .
په بلجيم کښي د ميشتو افغانانو هيله د هغو درنو لوستونکونو نه چي دا ليک لولي دا ده چي په ټول افغان اولس کي د سولي ، دوستۍ ، احترام او زغم کلتور رايج کړي ، جنګ موږ ته له بدبختۍ نه پرته بل څه نه دي راکړي .
موږ د خپل ګران ورور او د بينوايانو د يوه بينوا ، شهادت ته د درناوي سر ټيټوو٠
موږ ګران ( احسان ) د بينوا ډيوې هغه پتنګ ګڼو چي لمبې يي ليدې ، ولي د رڼا ساتلوته يي ژوند وباخښه .
د پتنګانو پر تقدير حک د ډيوی مينه ده
چا له اوبو نه د پتنګ مړۍ را ايستلۍ نه دی
ډيوه لګيږي او ځليږي د مين په وينو
د پتنګ قام چي له بهير نه لا وتلۍ نه دی
حاجي امين باوري
تورنې - بلجيم
١٦-١٠-٢٠٠٥
